D'Orakeu vor WM

Translated into Swiss German (Original version)


Seit nech Oktopus-Pöülu öppis? Är isch dr heimlech Star vor WM 2010 gsi, wüu er au Sieger vo de Dütschland-Spiu errate hett. Und im Finau sogar dr Wäutmeischter. Sini Karriere hett ar EM 2008 aagfange, wo ner 11 vo 13 Spiu korräkt vorhärgseit hett. Är hett jewiils eine vo zwöi Fueterbehäuter müesse uuswähle, wo d'Flagge vode beteiligte Nationaumannschafte druff si gsii. Leider ischer 2010 verändet.

Dr Poul isch aber nid dr einzig gsi. Dr Krokodil-Harry hett dr Sieger vor WM 2010  korräkt errate. Usserdäm hett er ds Resultat vo zwöi ufenanderfolgende ouschtralische Bundeswahle richtig vorusgseit. Leider hetts aber für ihn nie klappet, d'Popularität vom dütsche Oktopus z'erreiche. Dr Papagei Mani vo Singapur hetts o nid gschafft, obwou er ar WM 2010 au Siiger vo de Vierteu- und Haubfinau korrräkt errate hette. Si Fähler: e fausche Tipp im Finau Spanie-Holland.

Nach em früeche Verstärbe vom Pouli hetts grossi Konkurrenz um sini Nachfoug ghä. Ar EM 2012 heis grad drü Viecher versuecht: D'Elefantenfrou Citta vom Zoo vo Krakou in Pole. Dr Fredu, es Frettli us der Ukraine mit emene eigete Twitter-Account. Und nächär dr Funtik, es ukrainisches Söüli mittere Quote von 2/3 richtige Mätch-Tipps.

Wär wird d'Nachfoug vom Oktopus-Pöülu während dr nächste WM aaträte? Dr Papagei, wo ufem Petersplatz vom Papscht gsägnet worde isch und am italienische Fernseh scho ne Schtar worde isch? Oder doch ds Nelly, e dütschi Elefantechue wo 30 vo 33 Partie korräkt vorhärgseit hett? Mer sött o di heuseherische Fähigkeite vom junge Pandabär nid unterschätze, wo vo chinesische Staatsmedie puschet wird.

Dr italiänisch Papagei namens Amore (italienisch für Liebi) wääut für sini  Vorhärsag es Fähnli mit dr Siegermannschaft uf emene Miniatur-Fuessbaufäud uus. D'Nelly schutet lieber i eis vo de zwöi Gou wo jewiils di entschprächende Fähnli hange. Dr chli Pandabär wäut hingäge eine vo de Fueterchüble us, wone Länderflagge hängt. Ir K.O.-Phase chlätteret de ufe Boum, wo's wieder so Fähnli hett.

Heit dir o nes Hustier?
Hetts Vorhärsage und so no besser druff? Wie?
Lööt's doch mau la probiere!

by Cyru

11 Votes
#326 of #1440 in the World
#1 of #1 for Swiss German



Go to the ranking page for Swiss German

Can you translate better?

Join the challenge